بعض المختصين بيحددوا فترة المراهقه اللى بتظهر فيها مشاعر الحب للطرف الاخر بتبدأ بين سن الــ 15 و الـ 16 تقريباً ، وبيصفوه انه حب برئ صادق وفى نفس الوقت عابر وطائش .
واختلفت اراء الاعضاء على صفحة " معلومة في تطوير الذات " ما بين وصفه بأنه حب صادق وانه وهم وانه مجرد مشاعر متداخله .
ولكن فى الحقيقه احنا منقدرش نوصفه بأنه حب صادق او غير صادق ، لأن الصفه دى خاصه شويه واحنا محتاجين لصفه عامه تناسب طبيعة مرحلة المراهقه .
مرحلة المراهقه هى عباره كما يقولون علماء النفس عن ثورة الهرمونات .. وفيها تتدفق مشاعر المراهق والمراهقه بشكل حاد مش فى الحب بس ، ولكن فى كافة انواع الانفعالات (السرور ، الفرح ، الغضب ، الحزن ، الحب ... إلخ ) .
فــ دايماً بيكون الشخص محتاج لتفريغ انفعالاته المكبوته دى ، وسمه اساسيه من ضمن سمات المرحله هى المشاعر المتقلبه .
دايماً كل مراهق فاكر ان الحب اللى هو حاسه هو احساس عميق وقوى وبيحس احياناً كمان انه ممكن يضيع ويتوه فى الدنيا لو فقد الحب دا ، وفيه طبعاً اللى بياخده من باب التسليه ، ولكن خلينا نتكلم اكتر على الاغلبيه وهو اللى حاسس انه بدون الحب لا يساوى شئ .
حب المراهقه نادراً بل يستحيل انه يكمل ، حالات نادره اوى اللى كملت وكلها مبتقاش علاقات ناجحه فى المستقبل ، الشخصيه الانسانيه فترة المراهقه بتكون ناضجه وبتحاول اللجوء الى تحمل المسئوليه ولكن النضج العقلى لكل شخص فى المرحله دى بيكون غير كافى للحكم على العلاقه .. ودا مش عيب ولا حرام ، اكيد فيه ناس كتير فى سن المراهقه بتقرأ كلامى دا ، لكن الانسان الذكى فيهم هو اللى هيعمل بيه وهيفهمه ، ومش هيفهم كلامى الا بعدين سواء ولد او بنت .. نظرتك دلوقتى للطرف التانى من الناحيه الظاهريه والعاطفيه ومن ناحية نفسك كمتحمل للمسئوليه هتختلف تماماً نظرتك بعدها لما تعدى سن الــ 21 سنه او فى الحدود دى ، هتلاقى بعد كدا بتقول ايه اللى كنت بعمله دا !!
الحب فى الفتره دى ما هو الا ،،،
- استهلاك سريع للمشاعر .
- تعب للاعصاب وانحدار للنفسيه .
- الابتعاد عن المذاكره ومرح الحياه .
وبعدها فى الاخر بيحصل الندم الكبير اللى بعد ما بتتكون العشره بيحصل الفراق .. وبيؤدى الى نتائج سلبيه كبيره على الانسان ، ولحظة الندم ساعتها بتبأه تساوى الدنيا وما فيها ..
.
.
طب كله هيسألنى سؤال نبطل نحب ؟
هقولك لا متبطلش تحب ، ومتبطليش تحبى ، لان الحب ربنا سبحانه وتعالى خلقنا بالحب دا ، ودا شئ خارج عن ارادتك ، ولكن زى ما قولنا قبل كدا فى قاعدة 10/90 ان كل حاجه بتحصلنا وخارجه عن ارادتنا هى 10% ورد فعلك هو 90% .. غصب عنك ممكن تكون مشدود لحد معين ... ولكن اللى بارادتك هو انك تحكم عقلك ، متقربش متعشمش نفسك ، قول ادامى هدف ، ورايا حاجات ، يوم لما ارتبط ببنت لازم اكون ادام اهلها حاجه كبيره ، ويوم لما البنت ترتبط بولد تكون فاهمه نفسها وفاهماه وفاهمه الدنيا وعقليتها كسباها ثقة اهلها، وساعتها لما تيجى تقول لوالدتها فلان عايز يتقدملى ، هترحب ميت مره عن ما ممكن تقوليلها قبل كدا .
.
.
طيب ايه المطلوب مننا ؟
- اهتمى/اهتمى بحياتكم الاجتماعيه ، ربنا وهبلنا نعمة الصداقه وما اجملها ، اهتم باصحابك واخرج معاهم وخد بالك منهم وخاف عيلهم .
- اهتم بممارسة اى نشاط رياضى ولو رياضة المشى السريع يومياً من 15 لــ 30 دقيقه ، لان الرياضه دى تعتبر تنفيس انفعالى وعاطفى كبير احنا مش واخدين بالنا منه .
- مارس اى نشاط اجتماعى او ثقافى .
- شوف انت بتحب ايه وايه مجالك اللى نفسك تتخصص فيه واقرأ فيه وادخل اليوتيوب والفيس وجوجل ودور فيه .. اجمع عنه معلومات بحيث انك قبل ما تدخل الجامعه واثناء الجامعه يكون عندك معلومات بتميزك عن اى حد تانى ، وبعد كدا خيلك مُحاضر فى مجالك وانقل علمك للناس .
- قرب من ربنا سبحانه وتعالى ، واذكره كثيراً "ألا بذكر الله تطمئن القلوب"
- حكم عقلك ، واقعد مع نفسك وفكر كويس ، صدقنى محدش هيخاف عليك وعلى حبك ومشاعرك .. وصدقنى لما تباه انت حاجه كبيره وتلاقى الطرف التانى اللى يستاهلك بجد .. هتقول يا ريتنى ما كنت ضيعت وقت ولو دقيقه فى حاجه متستهلش ومخدتش منها غير التعب .. وفى الاخر نقول الحب عذاب .. واحنا بنعذب نفسنا لما بنختار الوقت الغلط والانسان الغلط .. ويوم لما تلاقى الحب اللى بجد وانت انسان عاقل وناضج عاطفياً ، هتقول على اللى فات للأسف اتحسب عليا حب !!
بايدك تسعد حياتك .. شعارى كان دايماً
"دعونا نخطف السعاده ونبيد الحزن إباده"
مقال بقلم
أ. عمرو شاكر
